Алишер Навоийнинг “Оққўюнли мухлислар девони” китоби тақдимоти

“Оққўюнли мухлислар девони” – Навоийнинг янги девоними?

9 февраль – Алишер Навоий таваллуд топган кун 

Самарқанд давлат университетида буюк мутафаккир, ғазал мулкининг султони Алишер Навоий таваллудининг 579 йиллиги муносабати билан ўтказилган “Алишер Навоий шеъриятининг ўз давридаги шарқона эътирофи” деб номланган анжуманда филология фанлари доктори Афтондил Эркинов ҳамда тадқиқотчи Рустам Жабборов томонидан нашрга тайёрлаган, филология фанлари доктори, профессор Муслиҳиддин Муҳиддинов масъул муҳаррирлигида “Шарқ” нашриёт-матбаа акциядорлик компанияси томонидан чоп этилаётган “Оққўюнли мухлислар девони” китоби ҳақида батафсил маълумот берилди.

photo5325858407837707674.jpg


– 2012 йилда филология фанлари доктори, профессор Афтондил Эркинов хорижда Навоийнинг янги девонини топди, – дейди Самарқанд давлат университети мустақил тадқиқотчиси Рустам Жабборов. – Мазкур девоннинг қўлёзма нусхаси 1471 йилда Оққўюнлилар салтанатида (1378–1502) кўчирилган бўлиб, ҳозирда Мисрдаги Қоҳира миллий кутубхонасида сақланади. Оққўюнлилар сулоласи Туркиянинг шарқий қисми, Арманистон, Озарбайжон, шимолий Ироқ ва Эрон ҳудудларида ҳукмронлик қилган ва темурийлар билан яқин муносабатда бўлган. Бу девон оққўюнлилар салтанати ҳудудидаги Навоий шеърияти мухлислари томонидан тартиб берилгани ва кўчирилганлиги сабабли шартли равишда “Оққўюнли мухлислар девони” деб аталди.

Ушбу девон Навоий шеърияти ихлосмандлари томонидан 1465-1466 йилларда тузилган “Илк девон”дан кейинги мухлислар девони сифатида навоийшунослик учун аҳамиятли бўлиб, Оққўюнлилар салтанати марказий шаҳарларидан бўлган Шерозда кўчирилган, деб тахмин қилинади.

 

photo5325858407837707671.jpgphoto5325858407837707673.jpg

“Оққўюнли мухлислар девони”га Навоийнинг 30 ёшгача ёзган шеърлари киритилган ва улар тили оққўюнлилар салтанатида ёйилган ўғуз туркчасига бироз мослаштирилган. Қўлёзмани оққўюнлилар саройи машҳур хаттоти, Анисий тахаллуси билан шеърлар ёзган Абдураҳим Хоразмий кўчирган.

Тадбирда китобни нашрга тайёрлаган филология фанлари доктори Афтондил Эркинов ҳамда тадқиқотчи Рустам Жабборов, масъул муҳаррир бўлган филология фанлари доктори, профессор Муслиҳиддин Муҳиддинов девоннинг ўзига хос хусусиятлари ҳақида маълумот берди.

Эътиборли жиҳати, мазкур тадбирда навоийшунос олимлар, университет ўқитувчи ва талабалари билан бирга Миллий гвардия хизматчилари ҳам иштирок этди.

 

Манба: УзА


07.02.2020     176